Өз әкесін сотқа берген қазақстандық студент ай сайын төлем алатын болды

Студент әкесінен алимент талап етті

Іс Батыс Қазақстан облысының Қазталов аудандық сотында қаралды.

Талап қоюшы колледждің күндізгі бөлімінде білім алатынын айтып, оқу кезеңінде әкесінен алимент өндіруді сұрап сотқа жүгінген.

Алайда іс мәні бойынша қаралғанға дейін татуластырушы судья тараптармен арнайы рәсім өткізіп, әкесі мен баласына дауды бейбіт жолмен шешу мүмкіндігін түсіндірді.

Нәтижесінде тараптар ортақ келісімге келіп, бітімгершілік келісімді бекіту үшін сотқа ұсынды.

Әкесі ай сайын 40 мың теңге төлейді

Келісімге сәйкес, әкесі студент ұлына 2026 жылғы 25 қыркүйектен бастап 2027 жылғы 25 маусымға дейін ай сайын 40 мың теңге төлеуге міндеттенді.

Осылайша, төлемдер студенттің оқу кезеңінде жүргізіледі.

Бітімгершілік келісім жасалғаннан кейін талап қоюшы бастапқы талабынан бас тартқан.

Сот істі тоқтатты

Қазталов аудандық соты әкесі мен баласы арасында жасалған бітімгершілік келісімді бекітті.

Осыған байланысты азаматтық іс бойынша іс жүргізу тоқтатылып, тараптарға мұндай келісімнің құқықтық салдары түсіндірілді.

Сонымен қатар сот ұйғарымы әзірге заңды күшіне енген жоқ.