Қазақстанда әлеуметтік көмектің 13 түрін 4-ке қысқарту ұсынылды

Әлеуметтік көмек жүйесі екі кезеңмен өзгеруі мүмкін

Еңбек және халықты әлеуметтік қорғау министрі Асқарбек Ертаев премьер-министр Олжас Бектеновке азаматтарға әлеуметтік көмек пен жеңілдіктер көрсету жүйесіне енгізу ұсынылып отырған өзгерістер туралы баяндады.

Бірінші кезеңде мемлекеттік қолдаудың атаулы моделіне көшу үшін қажетті нормативтік база қалыптастыру көзделіп отыр. Бұл өзгерістер қолданыстағы 36 төлемнің 14 түрін қамтиды.

Негізгі қағида — мемлекеттік қолдауды бірінші кезекте оған шын мәнінде мұқтаж азаматтарға бағыттау.

Екінші кезеңде жергілікті атқарушы органдар көрсететін әлеуметтік көмектің 13 түрін азаматтардың мұқтаждық деңгейіне қарай төрт түрге біріктіру ұсынылады.

Өзгерістер кімдерге қатысты болуы мүмкін

Үкімет отырысында әлеуметтік қолдауды азаматтардың нақты мұқтаждығына қарай көрсету мәселесіне ерекше назар аударылды.

2027 жылдың басынан бастап ардагерлерге де мемлекеттік қолдауды мұқтаждық қағидаты бойынша атаулы түрде көрсету жөніндегі ұсыныстар айтылды.

Жоспарланған реформалар «Отбасының цифрлық картасы» деректері бойынша әл-ауқат деңгейі «А» — жоғары және «В» — қанағаттанарлық санаттарына жататын мемлекеттік көмек алушыларды да қамтиды.

Қазір әкімдіктер «Отбасының цифрлық картасы» ақпараттық жүйесі арқылы азаматтар арасында сауалнама жүргізіп жатыр.

1 қазаннан бастап қазақстандықтарға хабарлама жіберіледі

Тағы бір маңызды өзгеріс 1 қазаннан басталады. Қазақстандықтарға әлеуметтік төлемдерді тағайындау шарттарындағы өзгерістер туралы кезең-кезеңімен хабарлау жоспарланған.

Ақпарат SMS-хабарламалар, eGov Mobile және банктердің мобильді қосымшалары арқылы жеткізіледі.

Үкіметтің мәліметінше, ұсынылған бастамалардың барлығы бойынша заңнамаға тиісті түзетулер әзірленіп, Құрылтайдың қарауына енгізіледі.

Жасанды интеллект арқылы күмәнді жағдайлар анықталды

Үкімет отырысында мүгедектігі бар адамдарға көмек көрсету кезінде жасанды интеллект құралдарын пайдалану нәтижелері де айтылды.

Медициналық құжаттарды қолдан жасау арқылы мүгедектік белгіленуі мүмкін деген 167 жағдай анықталып, материалдар құқық қорғау органдарына жолданған.

Бұдан бөлек, әртүрлі адамдардың деректерінде бірдей мәліметтер кездескен 18 647 жағдай анықталған. Бұл бағыттағы тексеру жұмыстары жалғасып жатыр.

Әлеуметтік көмектің қысқаруы төлемдердің бірден тоқтатылатынын білдірмейді

Әзірге сөз әлеуметтік көмектің 13 түрін төрт санатқа біріктіру туралы ұсыныс жөнінде болып отыр. Сондықтан қазіргі кезде азаматтарға беріліп жүрген барлық тиісті көмектің автоматты түрде тоқтатылатыны туралы айтуға негіз жоқ.

Ұсыныстар заңнамалық түзетулер түрінде Құрылтайдың қарауына енгізілгеннен кейін ғана олардың нақты қалай жүзеге асырылатыны белгілі болады.