Тегін Wi-Fi қымбатқа түсуі мүмкін: қазақстандықтарға ескерту жасалды

Алаяқтар тегін Wi-Fi желісін қалай пайдаланады

Сауда-ойын-сауық орталықтарында, саябақтарда, стадиондарда, фестивальдер мен концерттерде келушілерге тегін Wi-Fi ұсынылуы мүмкін. Алайда қоғамдық желілерді пайдаланғанда қауіпсіздік шараларын естен шығармаған жөн.

Мемлекеттік кірістер комитетінің мәліметінше, алаяқтар сауда орталығының немесе басқа мекеменің ресми желісіне ұқсайтын жалған Wi-Fi нүктесін құруы мүмкін.

Мұндай желіге қосылған адам зиянды бағдарламаны жүктеп алуы немесе жеке мәліметтерін, банк картасының деректерін және құпия сөздерін енгізуі ықтимал. Нәтижесінде бұл ақпарат алаяқтардың қолына түсуі мүмкін.

Жалған желінің атауы көбіне ресми Wi-Fi атауына өте ұқсас болатындықтан, пайдаланушы айырмашылықты бірден байқамауы мүмкін.

Wi-Fi желісінің атауын тексерген дұрыс

Қоғамдық Wi-Fi-ға қосылмас бұрын оның шынымен сол мекемеге тиесілі екеніне көз жеткізу ұсынылады. Ол үшін сауда орталығының, дәмхананың немесе басқа нысанның қызметкерінен ресми желінің нақты атауын сұрауға болады.

Егер желінің қауіпсіз екеніне көз жеткізу мүмкін болмаса, тегін Wi-Fi арқылы құпия ақпарат жібермеген жөн.

Атап айтқанда, қоғамдық желіге қосылған кезде интернет-банкингке кірмеу, банк картасының деректерін, парольдерді және басқа да құпия мәліметтерді енгізбеу ұсынылады.

Банк қосымшасы мен eGov үшін мобильді интернетті пайдаланған жөн

Банк қосымшасына, eGov жүйесіне, электронды поштаға немесе жеке мәліметтер сақталған басқа маңызды сервистерге кіру қажет болса, мамандар мобильді интернетті пайдалануға кеңес береді.

Қоғамдық Wi-Fi желісімен жұмыс аяқталғаннан кейін телефондағы Wi-Fi функциясын өшірген дұрыс. Ал бұл желіні қайта пайдалану жоспарланбаса, оны құрылғыдағы сақталған желілер тізімінен де өшіру ұсынылады.

Бұл телефонның кейін сол желіге автоматты түрде қайта қосылуына жол бермеуге көмектеседі.

Қауіп тек Wi-Fi желісімен шектелмейді

Киберқауіп тек қоғамдық интернет желілерінен туындамайды. Зиянды файлдар басқа сымсыз байланыс арналары арқылы да таралуы мүмкін.

Мысалы, алаяқтар AirDrop немесе Bluetooth көмегімен бөтен құрылғыларға күмәнді файлдар мен сұраныстар жіберуге әрекет етуі ықтимал. Сондықтан белгісіз адамдардан немесе құрылғылардан келген файлдарды қабылдамаған жөн.

Күмәнді сілтемелерді ашпау керек

Интернетті пайдаланғанда сайттың қорғалған қосылым арқылы жұмыс істейтініне де назар аудару қажет. HTTPS қорғанысы жоқ күмәнді сайттарға кірмеу және белгісіз сілтемелерді ашпау ұсынылады.

Мұндай сілтемелер зиянды бағдарламалардың құрылғыға орнатылуына немесе алаяқтардың әлеуметтік желілердегі аккаунттарға және басқа жеке мәліметтерге қол жеткізуіне себеп болуы мүмкін.

Қоғамдық орындардағы тегін Wi-Fi-ды пайдаланғанда желінің атауын алдын ала тексеру, қаржылық операцияларды мобильді интернет арқылы жүргізу және күмәнді файлдар мен сілтемелерді ашпау жеке деректер мен ақшаны қорғауға көмектеседі.