Қазақстан мектептерінде 2–4-сынып оқушыларын жаңа сынақ күтіп тұр

Оқушыларды қалай бағалайды

2026-2027 оқу жылынан бастап 2–4-сыныптарда оқушылардың білімін бағалаудың жаңартылған тәртібі қолданылады. Енді формативтік бағалаумен қатар аралық бағалау да жүргізіледі.

Аралық бағалау оқу бағдарламасының белгілі бір бөлімі немесе бірнеше бөлімі аяқталғаннан кейін өткізіледі. Оның негізгі мақсаты – оқушының өткен материалды қаншалықты меңгергенін анықтау.

Бағалау форматы пәнге байланысты әртүрлі болады.

Қазақ тілі немесе орыс тілі бойынша оқушылар диктант жазып, оқу сауаттылығына арналған тапсырмаларды орындайды. Мұнда баланың мәтінді сауатты жазуы ғана емес, оның мазмұнын қаншалықты түсінгені де ескеріледі.

Әдебиеттік оқу пәнінен шығарма немесе мазмұндама жазу қарастырылған. Сонымен қатар оқу сауаттылығына арналған тапсырмалар беріледі. Бағалау кезінде мәтінді түсіну, негізгі ойды анықтау және өз ойын жүйелі жеткізе білу қабілетіне назар аударылады.

Математикадан бақылау жұмысы өткізіледі. Оқушының есептеу дағдыларымен қатар есептің шартын түсінуі, дұрыс шешу жолын таңдауы және жауабын негіздей алуы бағаланады.

Қанша балл қойылады

Оқу-ағарту министрлігінің мәліметінше, бір аралық бағалау жұмысының ұзақтығы 40 минутты құрайды.

Ең жоғары балл сыныпқа байланысты белгіленген:

2-сыныпта – 12 балл;

3-сыныпта – 14 балл;

4-сыныпта – 16 балл.

Аралық бағалау нәтижелері электрондық немесе қағаз журналға балл түрінде енгізіледі.

Формативтік бағалау да сақталады

Жаңа тәртіп енгізілгенімен, формативтік бағалау жойылмайды. Ол тоқсан бойы жүргізіледі.

Оқу-ағарту министрлігінің түсіндіруінше, педагог әр оқушыны белгілі бір пән бойынша тоқсан ішінде өткізілген сабақтардың кемінде 30 пайызында бағалауы тиіс. Сонымен бірге тоқсанға жоспарланған оқу мақсаттарының кемінде 50 пайызы қамтылуы қажет.

Формативтік бағалау бұрынғыдай 1-ден 10 балға дейінгі шкала бойынша жүргізіледі.

Қолжазба үшін балл төмендетілмейді

Бағалау кезінде тағы бір маңызды талап қарастырылған. Егер каллиграфия арнайы бағалау мақсаты болмаса, оқушының жазу ерекшелігі оның балын төмендетуге негіз бола алмайды.

Ал 1-сынып оқушыларына балдық баға қойылмайды.

Жаңа бағалау тәсілінің мақсаты – балаға тек баға қою емес, оның оқу материалын қаншалықты меңгергенін анықтау, оқу барысындағы ілгерілеуін бақылау және әрі қарай дамуына бағыт беру.