Қазақстанда 620-дан астам адам маңызды мәртебесінен айырылды – себебі неде

Қос азаматтыққа жол берілмейді

Өңір полициясы 23 қыркүйекте Қазақстан заңнамасында қос азаматтыққа жол берілмейтінін еске салды.

Соған қарамастан, көші-қон қызметінің мамандары басқа мемлекеттің азаматтығын алғаннан кейін бұл туралы тиісті органдарға хабарламай, Қазақстан құжаттарын пайдалануды жалғастырған адамдарды анықтап келеді.

ШҚО полициясы көші-қон қызметі басқармасының бастығы Ринат Шкибаевтың айтуынша, анықталған деректердің басым бөлігі көршілес мемлекеттердің азаматтығын қабылдаған адамдарға қатысты.

21 жастағы тұрғынның құжаттары тәркіленді

Осындай жағдайлардың бірі Алтай ауданында тіркелді. 21 жастағы жергілікті тұрғын басқа мемлекеттің азаматтығын алған, алайда бұл туралы құзырлы органдарға уақытылы хабарламаған.

Тексеру барысында оның қазақстандық құжаттары тәркіленіп, Қазақстан азаматтығынан айырылу фактісі тіркелді.

Жыл басынан бері 620-дан астам жағдай

Полиция мәліметінше, 2026 жылдың басынан бері Шығыс Қазақстан облысында 620-дан астам адамның Қазақстан азаматтығынан айырылу фактісі тіркелген.

Бұдан бөлек, азаматтық саласындағы заңнама талаптарын бұзған 38 адам әкімшілік жауапкершілікке тартылған.