Баянды ауылы арақтан бас тартты

Сегіз мыңға жуық тұрғыны бар Баянды ауылында 9 дүкен бар. Барлығы меморандумға қол қойылғалы бері дүкен сөрелерінен алкоголь сусындарды алып тастаған. Бұл бастама ауылда мас күйде жасалатын қылмыс пен құқық бұзушылықтың алдын алып, үлгілі ауыл ретінде таныту мақсатында жасалып отыр. «Баяндыда арақ сатылмайды» деген жаңалыққа алғаш болып қуанғандардың бірі – Оралбай ақсақал. Қария соңғы кездері ауылдағы той, мерекелерде дастарханға арақ қою онсыз да сиреген еді дейді. Енді тіпті тыйым салынып отыр.

-Дұрыс шешім деп ойлаймын. Қазір мереке өткізгенде жас балдар ішіп алып түрлі жағдай болып жатыр. Сол үшін осы бастаманы қолдаймын. Көбісі шұбат пен қымызбен өткізіп жатыр. Жастарға үлкен сабақ болады деп ойлаймын, - дейді Баянды ауылының тұрғыны Оралбай Аллабергенов.

Бұл бастаманы көтерген тәртіп сақшылары екен. Себебі былтырдың өзінде Мұнайлы ауданында мас күйде жасалған 60-қа жуық қылмыс тіркелген. Соны азайту үшін ауылда арақ сатуды доғарайық деп шешкен. Оны әкімдік те дүкен ұстайтын саудагерлер де қолдай кетіпті.
-Ішімдік ішіп жасалатын қылмыстардың ауданымызда көбеюіне байланысты, соның алдын алу мақсатында алғашқы іс-шараны Баянды ауылында бастадық. Болып жатқан қылмыстың бәрі, 80 пайызы ішімдік ішкен күйде болады. Түсіністікпен қарап жатыр, жеке кәсіпкерлер. Сегіз азамат араққұмар есебінде тұр, деді Баянды ауылының учаскелік полиция инспекторы Рүстем Аяпов.

-Ауылдағы кәсіпкерлерге рақмет айтамыз. Идеяны қолдағанына. Алдағы уақытта қылмыс азаяды деп үміттенеміз. Ауылда спортты қолдау мақсатында стрит воркаут үш жерде орнатылды. Тағы екі жерге орнатамыз деген жоспар бар, дейді Баянды ауылы әкімінің орынбасары Бектұрлы Ыбыраев.

Ал ауылда арақ сатқандар ешқандай жауапқа тартылмайды. Мұның барлығы ерікті түрде жасалып отыр дейді полицейлер. Дүкен сатушылары да үлгілі ауыл болу үшін ережені бұзбаймыз деп отыр.

-Біз тек сыра сататын едік. Алкоголь жоқ бізде. Бұл бастаманы әрине қолдаймыз. Естігенде таң қалдым. Қызық болдым. Бірақ ол шешімді қолдаймын. Қосыламын. Үлгілі ауыл болғанға не жетсін?!, дейді кәсіпкер Алмагүл Іліпбаева.

Әкімдіктегілер арақтан бас тартқан Баянды ауылы үздіктер қатарына кіретініне сенімді. Тіпті ауылда мәдениет пен спорт саласын мықтап қолға алып дамытуды жоспарлап отыр. Қазір спорт кешенін салуға құжат дайындалып жатыр.