Маңғыстауда қызылша ауруын жұқтырған 3 адам тіркелді

Спикердің айтуынша, бүгінгі күні республика бойынша қызылша ауруының белгілері бар 2192 адам тіркеліп, 939 жағдайда нақты дәлелденген. Атап айтқанда, Алматы қаласында - 548, Атырау облысында – 69, Астана қаласында – 49, Жамбыл облысында – 61, Шымкент қаласында - 44 жағдай тіркеліп, зертханалық дәлелденген.

-Соңғы рет облыста аурудың өршуі 2015 жылы-292 жағдай, 2019 жылы – 1 422 жағдай және 2020 жылы – 361 жағдай тіркелген. Қазіргі уақытта қызылша ауруының алдын алу бойынша жұмыстар жалғасып жатыр, - деді Бердібек Саралтаев.

Брифинг барысында Маңғыстау облыстық көпбейінді ауруханасының инфекциялық бөлім меңгерушісі Гүлбану Нұржанова қызылша ауруынан кейінгі асқынулар болуы мүмкін екенін айтты.

- Қызылша – жедел ағымды жүретін, ауа – тамшылы жолмен жұғатын вирусты жұқпалы ауру. Ауру дене қызуының көтерілуімен, 2-4-ші күндері теріге ақшыл қызыл түсті бөртпелердің шығуымен, жоғарғы тыныс жолдарының, ауыз-жұтқыншақ қуысының және көздің шырышты қабықшаларының қабынуымен басталады. Қызылша ауруы асқынып кетсе отит, пневмония, энцефалит, 2 жасқа дейінгі ауырған балалар арасында бірнеше жылдардан соң панэнцефалит дамуы мүмкін, - деді Гүлбану Нұржанова.



Сондай-ақ, спикер қызылша вирусы науқас адамнан дені сау адамға ауа – тамшылы жолдармен, яғни сөйлескенде, жөтелгенде, түшкіргенде және мұрыннан, жұтқыншақтан бөлінген бөлінділер арқылы тікелей және тікелей емес қарым-қатынаста жұғатынын айтады.

- Қызылша ауруымен ауырған науқас – қоршаған ортаға бөртпелер шыққанға дейінгі және бөртпелер шыққаннан кейінгі 4 күн ішінде өте қауіпті. Вирусты
жұқтырғаннан кейін, ауру 7 – 18 күннен соң дамиды. Қызылша ауруынан қорғанудың ең тиімді әдісі – вакцинация. Вакцинаның алғашқысы 1 жаста,
екіншісі 6 жаста салынады. Вакцинациядан кейін адамда ауруға қарсы тұратын күш - иммунитет қалыптасады. Сондықтан балаға уақытында екпе алу маңызды. Ауырып ем іздегенше ауырмаудың жолын іздеген маңызды екенін ұмытпайық, - деді Гүлбану Нұржанова.

Айта кетейік, ҚР бас мемлекеттік санитариялық дәрігерінің 2023 жылғы 14 наурыздағы №1 қаулысына сәйкес биыл 1 жастан 17 жасқа дейінгі адамдардың екпесіне ревизия жүргізілген. Нәтижесінде ағымдағы жылдың 1 наурыз бен 31 мамыр аралығында 2019 адам ғана екпе алса, қызылшаға қарсы екпе алмаған және егу мәліметтері жоқ - 16 514 адам анықталған.